विद्यार्थ्यांच्या तोंडी ही भाषा?

या मुलीचे वय काय असावे? ती ज्या घोषणा देतेय किंवा त्याचा अर्धा भाग म्हणतेय व इतर जमलेले तो पुरा करत आहेत, त्याचा अर्थ काय होतो, हे तिला माहीत नाही का? निश्चितच माहीत आहे. ती कुणाला उद्देशून ते म्हणतेय हे महत्त्वाचे नाही, ती तसे म्हणतेय व ते चुकीचे आहे. तो व्हिडिओ न पाहण्यासारखा व न ऐकण्यासारखा आहे. https://x.com/Radhika_Khera/status/2080295061670256787   म्हणून त्याचा फक्त स्क्रीनशॉट घातला आहे.  https://x.com/SaffronQueen_/status/2080204857785319609 ही युवती भारताचे भविष्य असेल तर मग विचारायलाच नको.  https://x.com/BefittingFacts/status/2080503410043076793 या व्हिडिओतील लहान मुलगा जे म्हणतोय किंवा त्याच्याकडून वदवून घेतले जात आहे, ते अक्षम्य आहे. हे सगळे मोदींविरोधात आहे; राहुल गांधींविरोधात असते तरीही ते अजिबात क्षम्य नाही. कुठल्याच व्यक्तीच्या विरोधात हे योग्य नाही. ज्या वयात शिकायचे त्या वयातील पोरांकडून हे म्हणवून घेतले जातेय? 

युवावर्गाच्या तोंडी शिव्या देणे "नॉर्मलाइज" करून ठेवले आहे. हे कूल आहे, असेच त्यांना वाटते. बहुतांश वेबसिरीजमध्ये दर वाक्यागणिक शिव्या हासडल्या जातात. प्रेम व राग व्यक्त करण्याचे ते सशक्त माध्यम म्हणून रुजवले गेले आहे. शिव्या काय कोकणातही, गावातही दिल्या जातात, हे त्याचे समर्थन असू शकत नाही. उद्या याच मुलीच्या आईवडिलांना संबोधताना कुणी असे शिव्या देऊन उल्लेख केले तर याच मुलीला ते चालतील का? हीच मुलगी आपल्या आईवडिलांशी याच अर्वाच्चसूचक भाषेत बोलली व तिचे मित्रमैत्रिणी पुढील वाक्य पुरे करू लागल्या तर आईवडिलांना ते चालेल का? त्यातही इतका बिनडोकपणा चालतो की, एक वयस्क, शहरी बाई "मोदी मेरे ***(इंग्रजीत प्रेमाचे दिवस) पे" म्हणते. https://x.com/dharmendrpatel_/status/2080299393014698271 

हा विरोध नाही, ही निर्बुद्ध विकृती आहे.  

विविध विचारधारेच्या विद्वानांना एकमेकांवर आरोप करताना, मुद्दे खोडून काढताना, आपले मुद्दे मांडताना त्यांच्या तरुण वयातही ऐकले आहे. मुद्दे पटत नसले तरी सांगायची पद्धत आवडायची व त्यामागची तळमळ जाणवायची. त्यांचे न घाबरता व परिणामांची पर्वा न करता बोलणे भावायचे. पण, कितीही राग असला तरी त्यांच्या तोंडी ही गलिच्छ भाषा कधीच नव्हती. आवेगात चुकून आलाच एखादा अपशब्द तर ते आवरायचे. क्षमा मागायचे व पुन्हा बोलू लागायचे. त्यांच्या रागाची तीव्रता पोहोचायची. त्यांचा निर्भिडपणा भिडायचा. 

निर्भीडपणा, बिनधास्तपणा व्यक्त करण्यासाठी शिवी हासडली पाहिजे व ते किती कूल आहे हे वारंवार ठसवले गेले आहे. त्याला प्रतिउत्तर देताना मर्यादा येतात. त्याच पातळीवर जावे लागते किंवा गप्प राहावे लागते. या समस्येला आज उत्तर नाही. याला उत्तर त्यांचीच मुले त्यांना त्याच भाषेत देऊ लागतील, तेव्हा मिळेल. तोवर उशीर झालेला असेल.